Pa: 4 personesTiempu: 2 h 30 min
Ingredientes
- 8 cebolles medianes
- 250 g de bonitu n’aceite d’oliva
- 2 güevos cocíos
- 1 pimientu roxo asáu
- 2 tomates maduros
- 200 g de salsa de tomate
- 2 dientes d’ayu
- 1 vasu pequeñu de vinu blancu
- Caldu o agua
- Fariña y 2 güevos pa rebozar
- Aceite d’oliva y sal
Preparación
- Vacia les cebolles
Pélales, corta un pocu la base pa que s’aguanten de pie y vacíales per arriba con una cuyarina, dexando dos o tres capes pa que nun se rompan. Guarda lo que saques: ye la base de la salsa.
- Prepara’l rellenu
Mez el bonitu esmigayáu colos güevos cocíos y la metá del pimientu, too picao, y delles cuyaraes de salsa de tomate. Tien que quedar xugosu pero compactu, ensin caldu.
- Rellena les cebolles
Rellénales apretando un pocu, ensin enllenales de más. Guarda’l rellenu que sobre.
- Rebózales y fríeles
Pásales per fariña y güevu batíu y fríeles n’abondo aceite caliente, dándo-yos la vuelta, hasta que tean doraes per fuera. Déxales escurrir enriba de papel de cocina.
- Fai la base de la salsa
Nuna cazuela grande, pocha amodo con un pocu d’aceite la cebolla que sacasti, picada, col ayu, el restu del pimientu y los tomates, como si fore un pisto.
- Guísales a fueu lentu
Pon les cebolles de pie enriba de la base y écha-yos el vinu, el rellenu que sobró y caldu o agua hasta casi cubriles. Tapa y déxales a fueu suave alredor d’hora y media, hasta que tean tienres pero enteres: al pinchales, el cuchiellu tien qu’entrar ensin esfuerciu. Prueba de sal al final.
- A la mesa
Sírveles calientes, bañaes na so salsa, con pan pa mollar.
Trucos y conseyos
- Ensin priesa. El secretu ye’l fueu lentu: con priesa, la cebolla queda dura y el rellenu, secu.
- Cada casa, el so trucu. Hai quien nun les reboza y les guisa tal cual, y quien pasa la salsa pol pasapuré enantes de serviles.
- Otros rellenos. La orixinal ye de bonitu, pero tamién se faen de carne y hasta de mariscu.
- El menú de la fiesta. En L’Entregu cómense con callos y, de postre, casadielles.
¿En casa faéisles d’otra manera? Cuéntanoslo en festejoslentregu@gmail.com.
