Fiestes Gastronómiques

Les Cebolles Rellenes

Name: Les Cebolles Rellenes 2026
Start: 2026-11-27
End: 2026-11-28
Location: El Entrego

27 y 28 de Payares de 2026

Una Fiesta culinaria con Hestoria

La fiesta de les Cebolles Rellenes entamó a celebrase en 1972, magar que la so hestoria vien dende l’añu 1927. Aniceta Fueyo, conocida como La Nina, dueña y cocinera del Restaurante La Laguna, atopóse con que, siendo Vienres Santu, vienres de vixilia, nun tenía más que unes cebolles y unes llates de bonitu pa da-yos a los sos clientes, y ocurrióse-y rellenar les cebolles.

La Nina foi quien inventó’l platu, pero dizse que foi Aurora, del Restaurante La Conda, quien fizo que’l platu algamara fama, porque foi ella quien más lu preparó nel so llocal. Mario Antuña, nietu de la Nina, escribió un pregón bien sentíu nel añu 2004 pa la fiesta de les Cebolles Rellenes, onde contó cómo nel añu 1972 un grupu d’entreguinos, con José Manuel Blanco a la cabeza, propunxeron crear la Fiesta Gastronómica de les Cebolles Rellenes, idea que la creadora del platu acoyó con munches ganes.

Esi añu convidóse a un grupu de periodistes a comer y presentóse-yos la fiesta y el platu. La propia Nina pagó los gastos y, gracies a esta iniciativa y a les ganes de los sos promotores, les cebolles rellenes algamaron col tiempu’l rangu de Fiesta Gastronómica d’Interés Rexonal.

Asina, cada 30 de payares, toles cases del pueblu s’enllenen col arume d’esti platu, y L’Entregu convertise en puntu d’alcuentru de families y amigos. Les cebolles formen parte d’un menú que lleva tamién callos y postres como casadielles, arroz con lleche o frixuelos.

Vídeo de la fiesta de las Cebollas Rellenas

Al calcar cárgase’l vídeu dende YouTube. Velu en YouTube

Un Menú con muncha Tradición

Sabores de siempre, fechos a fueu lentu y con recetes que pasen de xeneración en xeneración. Ven a probar lo meyor de la nuesa cocina popular.

¿Quies faceles en casa? Equí tienes la receta.

Cebolles Rellenes

El nuesu platu más emblemáticu: cebolles tienres rellenes y guisaes amodo nuna salsa fuerte, de les que güelen a casa. Tradición pura en cada cuyarada.

Callos

Callos a l’asturiana, col so puntu d’allegría y muncho sabor. Un clásicu de los de toa la vida, perfeutu pa entrar en calor y fruyilos ensin prises.

Casadielles

El remate dulce: casadielles caseres, crucientes per fuera y xugoses per dientro, col so rellenu de siempre. El final perfeutu pa una comida de fiesta.

Les Fiestes

Les Fiestes Gastronómiques de les Cebolles Rellenes son d’eses celebraciones que se recuerden por un motivu bien claru: el pueblu enteru güel a guisu. Dos díes (de normal vienres y sábadu), L’Entregu camuda: cases cocinando, chigres a tope, música na calle y un ambientazu que xira al rodiu del platu más queríu.

¿Qué tienen d’especial?

Lo más guapo ye lo auténtico: la tradición de cocinar en casa. Dende primera hora yá se nota que pasa daqué distinto… porque les calles s’enllenen d’esi arume tan de nueso de les cebolles faciéndose a fueu lentu. Ye como si tol pueblu tuviera na mesma cocina.

Ilustración de la fiesta de las Cebollas Rellenas

Vienres

pregón, música y primer gran verbena

El vienres suel entamar con un plan deportivu y solidariu: pela tarde organícese dalgún torneu benéficu, munches vegaes conocíu como «el torneu de les cebolles rellenes», pa dir atizando l’ambiente.

A media tarde llega l’actu inaugural, col pregón a cargu d’una persona reconocida y bien amestada al pueblu. Y en munches ediciones entrégase tamién un reconocimientu bien especial: la «Cebolla d’Oru», un premiu pensáu pa poner en valor asociaciones, persones o negocios qu’aportaron daqué importante a la comunidá.

Dempués, la fiesta vase notando nes calles: suel haber música en direuto (bandes o actuaciones) na zona de la ilesia o pelos alrodios, y el pueblu va garrando ritmu.

Y cuando llega la nueche… ábrese la primer gran cita: a les doce, primer gran verbena, con orquesta o grupos d’equí al llau y, pa rematar, DJ hasta que’l cuerpu aguante.

Sábadu

el día grande (y el día de reservar mesa)

El sábadu ye’l día nel que L’Entregu ta a petar. Los chigres y los restaurantes s’enllenen, y vívese’l platu típicu como se merez: munchos llocales ofrecen el menú tradicional, con cebolles rellenes, callos y casadielles. Nótase muncho: hai reserves feches dende selmanes enantes y l’ambiente, tanto a la hora de comer como a la de cenar, ye espectacular.

Pela mañana suel haber dalguna actividá p’animar el vermú (festival, actuaciones o propuestes pa dir entrando n’ambiente), y pela tarde llega ún de los momentos más esperaos.

Y a partir d’ehí, tarde d’ambiente, cenes, chigres enllenos y calles con vida hasta que llega’l gran remate:

A les doce de la nueche, segunda y última gran verbena, de normal con una orquesta fuerte nel primer pase y DJ pa despidir les fiestes como toca: con música, xente y bon humor.

Ilustración de los bares llenos el sábado

Concursu Gastronómicu

Na carpa, dempués de la comida, celébrase’l concursu gastronómicu, de normal con tres categoríes:

Non profesional

La categoría más auténtica: la de quien cocina en casa cola receta de siempre, esi puntu familiar que cada casa defende como «la bona». Equí valórase la tradición, el cariñu y el sabor de toa la vida.

Profesional Llocal

Equí compiten los llocales que viven estes fiestes a lo grande y que lleven díes —o selmanes— preparándose pa dar el meyor serviciu. Valórase la técnica, la regularidá y esi toque que fai qu’un platu destaque ensin perder la esencia.

Profesional Non Llocal

Un sitiu pa que chigres y restaurantes d’otros llugares se sumen a la fiesta y amuesen la so versión de les cebolles rellenes. Ye la categoría perfeuta pa ver idees nueves y comprobar cómo un platu tan de nueso tamién inspira fuera del pueblu.