Fiestes Patronales

La Laguna

17 al 20 de Xunetu de 2026

Una Fiesta con más de 100 años

Buscando datos que lo acrediten, atopamos que les Fiestes de La Laguna en Ciañu Santa Ana (asina se llamaba la nuesa villa hasta qu’en 1958 s’instaura oficialmente’l nome de L’Entregu) celebráronse per primer vez nel que güei ye’l parque, nel añu 1907.

N’aquella dómina, el llugar qu’agora ocupa’l parque yera namái un prau mui grande, conocíu pola xente como’l «Prau d’Abaxo». Cuando llovía muncho o medraba’l ríu Nalón, solía encharcase y l’agua formaba una especie de llaguna: por eso a esa zona se la conocía como La Laguna y, dempués de facese allí el parque, inda güei se-y llama Parque de La Laguna.

Nun sabemos cuálos fueron les razones poles que se decidió cambiar de sitiu la Romería de Nuesa Señora del Rosariu, que hasta esi añu y dende tiempu inmemorial se celebraba na zona de La Escura. Seique se buscaba un sitiu meyor, nun prau más grande y más céntricu. Quién sabe. Lo que sí ye seguro ye que la primer vez que les fiestes se celebren nel «Prau d’Abaxo» foi nel añu 1907 y que, al treslladase a la zona de La Laguna, pasaron a conocese hasta güei como les Fiestes de La Laguna.

Los que llevaron alantre esti cambiu fueron D. Manuel Blanco, D. Adolfo Martínez y D. Gabino Álvarez Calleja, asina que podemos nomalos como los padres d’estes fiestes.

Y estes primeres fiestes de La Laguna celebráronse los díes 7 y 8 de setiembre de 1907, porque n’ochobre —que ye cuando cai’l día de Nuesa Señora del Rosariu— les temperatures nun yeren les meyores pa facer celebraciones al aire llibre.

Más o menos asina fueron aquelles primeres fiestes nel Prau d’Abaxo, les primeres fiestes de La Laguna propiamente diches.

Cartel antiguo de las fiestas de La Laguna

Carrera de burros en las fiestas de El Entrego

Les Fiestes

Les Fiestes de La Laguna (L’Entregu) son la escusa perfeuta pa venir a conocer el pueblu na so meyor versión: calles con ambiente, música pela nueche, actividaes na carpa y tradiciones que se viven «como siempre», pero con ganes de celebrar a lo grande.

El Vienres

Entamu oficial… y primer nueche fuerte

La salida dala’l pregón, de normal na tarde del vienres. Cada añu dalu una persona especial: daquién del pueblu o mui amestada a L’Entregu, a quien se-y reconoz la so trayeutoria y too lo qu’aportó a la comunidá.
Y en acabando’l pregón entama lo bono: primer gran verbena de la fin de selmana, con actuaciones y DJs p’atizar l’ambiente dende la primer nueche.

Sábadu

EL DÍA GRANDE

El sábadu ye’l día nel que L’Entregu s’enllena de vida. Pela tarde suel haber actividaes na carpa, xuegos y campeonatos (munchos años, el clásicu parchís), un plan perfeutu pa venir en familia o colos amigos.

Pela nueche llega’l momentu estrella: la gran actuación del sábadu, con un convidáu fuerte y el pueblu a tope. Ye’l día de cenar polos chigres, atopase con xente y dexase llevar pol ambientazu de fiestes.

Domingu

planes tol día

El domingu sigue col ritmu dende pela mañana coles concentraciones de motos, y a lo llargo del día hai actividaes variaes. N’otros años hubo hasta carreres de cintes a caballu, amás de xuegos y propuestes na carpa.

Ye un día ideal pa venir a pasar la xornada entera y enllenase d’ambiente.

Llunes

tradición pura, «la Xira» y el gran final

El llunes ye festivu llocal y ún de los díes más auténticos. Na carpa failse la entrega del bollu, la botella de vinu y el revoltixu a los socios, de normal ente mediudía y la tarde.

Y dempués llega ún de los momentos más esperaos: la Xira. La xente xúntase pa merendar-cenar, picotiar, charrar y celebrar en grupu, andando polos chigres o axuntándose en mesos como manda la tradición. (Los más mozos, de toa la vida, tamién lo viven a lo grande col so plan tipu espicha).

Pa rematar, pela nueche hai un espectáculu de fuegos artificiales nel Parque Inglés, preparáu pa que’l momentu grande seya sobre les doce de la nueche, y xusto dempués… el remate perfeutu: última gran verbena, con orquesta o DJ pa despidir les fiestes como se merecen.